| Ыджыт Коча посадлöн история | Музейлöн удж | Коми декада |
Ыджыт Коча посад, кöда кöркö пыравлöм Юксеевскöй волостьö, кузя нюжалöма вылын береггеза Нылва ю веьтöт. Волостнöй правленнёсянь Коча посад вöлöм 27 верста ылынаын, а уезднöй Чердынь карсянь нельки 171 верста. 1579 годся перепись сьöртi Ыджыт Кочаын вöлöмась только 14 двор. Посадын олiссез унажыксö видзöмась пода, уджалöмась ыббез вылын, нельки тöдöмась трехполье. Вот мый гижис И.И.Яхонтов: «Нестерово деревня паныт Косалö Онолва ю дорын, отир 13, гöран му 58 четь, чапкöм (гöртöм) 16 четь. Му умöлик, вöр 12 десятин, косьтöм турун Нылва дорын 150 юр. Сысянь оброк 2 гривна и 2 деньга пошлина. Öтiк крестьянинлöн эта деревняын эм мельница-колотовка. Этö Лунег Нестеров (язычник). Мельница понда тожö вештöмась оброк 1 гривна и пошлина 1 деньга». Посадын олiссез сiдзжö кыйöмась чери да вöралöмась, кöда вылын и олöмась. Мöдiк перепись сьöртi (1623 – 1624) вöлi мыччалöмась олiссез только уже 3 дворын, а пустöй дворрез – 13. 1769 годсянь Коча посад лоис шöр посадöн волостьын. И уже 1801 годö (воö) Кочинскоöй волостьын лыддиссисö 1294 морт, кöдна вöлiсö Г.Д.Строганова ныв графиня Шаховская кипод увтын. 1858 воö бöра жö перепись сьöртi Кочаын вöлiсö 580 морт. Эта уже вöлi ыджыт посад аслас вичкуöн.  Посыдын сiя коста вöлi осьтöм церковно-приходскöй школа, казённöй виннöй лавка. Быд год вовлывлiсö вузасьны июнь 19 да август 17-18 луннэзö. Неылын посад дынын вöлi сувтöтöм даже кытшöмкö кирпич керан керку. Чердынь уезднöй карсянь 1896 воö вöлi керöмась обследованнёэз хозяйство да олан коласын: «Посадын олiссез унажыксö вердсьöны му вылын, кöда эта пора кежö вöлi бур, сiдз кыдз 39 дворись олiссез сейисö ассиныс быдтöм нянь, а 13 дворись вермисö даже петкöтны рынок вылö. Керисö вöр, медбы кылöтны Коса ю вылöт». Кочаын пондiсö чулöтны даже ярмаркаэз август 10 – 23 луннэзö. Земскöй собраннё вылын Чердынь уезднöй карын 1896 воö вöлi примитöм решеннё: Ыджыт Кочаын осьтны земскöй начальнöй училище. Пока инспектор М.И.Лебединскийöн вöлi керöм проект, сы коста оссисö Сеполь, Тимин, Пыстöг деревняэзын виль школаэз. Земскöй управа сьöртi 1901 воö Кочаын аркмис инькаэзлöн община Яков Шестаков Кудымкарскöй священник кипод увтын. Новгородскöй губернияись вöлi корöмöсь медодзза сойез, кöдна некыдз эз вермö велавны эта олан вылö, и пышшисö.  Вились Ыджыт Коча посадö инька общинаö локтiсö Вятскöй губерния Сарапульскöй уезд Сарканскöй общинаись 5 сой-вотяккез. Уже Кочаын пондiсö öксьыны этчö общинаас, даже вайöтiсö пода. Асьныс пондiсö отсасьны олiссезлö паськöм вурöмын, кöмкöт керöмын, кöда и лоис ны понда оланöн. Юралiсьöн инька общинаын лоис 1910 годсянь Мария Михайловна Хлобыстова. 1910 годся юöррез сьöртi посадын 71 двор, а олiссез – 427. |
68 во ни лоас, кыдз кончитчис Великöй Отечественнöй война. Но, кыдз баитiс Суворов: «Война оз кончитчы сэтчöдз, кытчöдз оз ло дзебöм последньöй солдат». Музей пондöтö удж, медбы кошшыны война коста öшöм солдаттэз. Öння кадö ни аддзисисö юöррез, кытöн дзебöм Пыстогов Андрей Фотеевич, 1916 во чужöмся, кöда мунiс война вылö тышкасьны 1941 воын Беленькова деревняись.  Следопыттэз Орловскöй областись иньдiсö юöр, что сiя торксьöм фашистскöй концлагерын, кöда вöлi керöм Орёл городын 1941 воö. Сiя дзебöм братскöй могилаын, кöда весьтын сулалö памятник.Ми адззим сылiсь и рöднясö: Пыстöг да Беленьково деревняэзын олöны сылöн племянницаэз - Пыстогова Анна Алексеевна да Пыстогова Любовь Михайловна.
Памятник г.Орёлын, кытöн дзебöм Пыстогов Андрей Фотеевич. | Басняэз сьőрті рыт Школаын вőлі коми кыв вылын мероприятие. Быд класс гőтőвитіс Пахоруков басняэз сьőрті сценка. Челядь мыччалісő не только басняэз сьöртí тőдőммез, но и ассиныс таланттэз. Любő вőлі видзőтны кыдз учőтиккез вылő, сідз и ыджыттэз вылő. Медбура ни гленитчисő быдőнныслő витőт да дасőт классісь велőтчиссез.
Дружнöй класс Дасöт классiсь томпöлöс Керны кужöны быдöс. Вермöны нiя уджавны, А вермöны и ыждавны. Миян нёль эм мича ныв, Зоннэз эшö дасöн. Быдыс тöдö ассис кыв, Тöдö и
серпассэз. И спортсменнэз эмöсь миян, Мийö одзланiн пыр, Миян шудыс – миян киын Дасöт классыс медся бур! Медбур класс и удав челядь И сэтшöм жö класснöй мам. Миянкöт быдса неделя, Миян дынö öддьöн рам. Но и ми радейтам сiйö Öтамöдкöт ми быд пыр, Надьтö, меддружнöсь мийö. Гажтöм, если торйöн дыр. А кöр öтлаын гажöтчам, Сэк миянлö нем оз ков, Ми танцуйтам, ми орсöтчам, Мед кöть гожум, мед кöть тöв. |
 |  | Сералыштам  |
